Parenting SOS

دائما كنت اروح للاخصائي اقول له مش عارفه ليه ابني بيعمل الحاجه الغلط رغم أن بقول عليها لا؟ ليه مش بيسمع الكلام؟ ليه بياخد باله و يسمع أما بروح له و ازعق، رغم أن كنت بكلمه براحه قبل كدا؟ الجواب ببساطه للفت الانتباه!  الأطفال بيوصل لهم تأنيب ، زعيق، توجيه اكتر من الاحتفال و التشجيع علي الانجاز. الطفل بيكون فكره عن أهله مع الوقت ، انا عارف ان ماما لسه ما اتعصبتش، فا مش هرود عليها! لسه مصرختش فا مش هبطل اللي بعمله! اول ما تصرخ أو الاقيها جايه اعرف أن كدا جابت آخرها هبطل الغلط 🧐 الاطفال اذكياء جدا. تخيل معايا العكس لو نسبه الاحتفال بابسط الاشياء موجود و بيحس بالفرحه في عينك، دا هيحفز الطفل أنه يعمل الحلو عشان عايز يشوف التشجيع دا ، عاجبه أن بيلفت الانتباه.بس هنا علي السلوك الجيد  هيبدا يفرق بين رد الفعلين من الأهل و يبدأ يحب رد الفعل الإيجابي عن السلبي. طيب برضوا ليه بيعمل غلط وانا بقول عليه لا؟ عشان بيلفت الانتباهك؟! بس انا بزعق،بضرب ازاي عايز انتباهي؟ هو شايف انك بتسيبي اللي في ايدك و تروحي له، حتي لو بتزعقي أو تضربي بس بصيت له! فا هو هيعمل نفس السلوك رغبه في الحصول علي انتباه ا...

#التعزيز reinforcement  التعزيز هو انك كاب/أم  ،أو معلم/معلمه بتشوف حاجه بيعملها الطفل رد فعلك عليها اسمه تعزيز و ممكن يكون سلبي او ايجابي.   التعزيز معناه إنك بتعطي مكافاه علي السلوك ماديه أو معنوية . تعزيز إيجابي(+) يعني مكافاه محببه أعطتها للشخص. تعزيز سلبي(-) يعني حذفت شي غير محبب كنوع من المكافاه. *  مثال لو ابنك عليه قبل ما ينام:  ١-يروق الاوضه  ٢-يرجع الكتب مكانها   ٣-يغسل سنانه  فالأم تري أن الولد روق الاوضه كويس جدا فتقول له رائع جدا و الغرفه شكلها منظم عشان كدا انا هساعدك و ارجع الكتب و انت اغسل سنانك.  هنا التعزيز سلبي(-) يعني طرحت شئ للمكافأة ،فاكيد الطفل هيكون مبسوط لأن المهام بتاعته خفت.    أما التعزيز الإيجابي(+) فهو إضافة شئ للمكافأة. لو اخدنا نفس المثال اللي فوق، بعد ما الطفل خلص المهام المطلوبه، كان في تشجيع من الأم و فرحه أنه خلص مهامه و  حضنته وضعت له نجمه بجانب كل مهمه أنجزها أو ملصق (استيكر ) محبب له، هنا دا اسمه تعزيز إيجابي(+) انا عملت مكافأة للسلوك بإضافه شي محبب. **في الحالتين المطلوب أنه الطفل يش...

٢-التايمر ⏲️ زمان و أولادي صغيرين ٣ و ٤ سنين كنت بستغرب اوي علي الامهات اللي بيكونوا في منطقه الألعاب و يقولوا يلا هنمشي و أولادهم ماشاء الله بيمشوا عادي 🙂 أو يقولوا خمس دقائق🖐️ و ماشين و يمشوا عادي. احنا كنا بندخل المكان مش بنخرج😎 الي أن تعرفنا علي التايمر⏲️ وهي حاجه بسيطه و لكن سحريه🪄 بمنتهي البساطه حضري ابنك من البدايه أن احنا هنروح فين و هنعمل ايه   بعد كدا رايحين فين. مثال:  ١-نلعب ٢-تايمر ٥ دقائق ٣- نمشي زي الشاطر ٤- ناكل ايس كريم روحتوا منطقه العاب لازم الورقه في ايدك و تفكريه قبل ما يدخل و يقول وراكي الخطوات و بعدين يدخل يلعب.  قبل ما يخلص الوقت ،روحي قولي له ٥ دقائق و هنمشي و اعملي تايمر علي الموبايل او هاتي تايمر بلاستيك في ايدك ، في apps كتير للتايمر و فيها اشكال في واحد اسمه countdown  أو  Mrbomb and friends. و كل شويه روحي عنده وخليه يشوف التايمر فاضل قد ايه و يخلص، دقيقتين، دقيقه، لازم الورقه في ايدك. و اول ما يخلص شجعيه يلا يلا شاطر يلا بينا يلا عشان اتفقنا علي الايس كريم خد الفلوس انت اشتري، مثلا. مهم يكون في اتفاق و خطوات واضحه و مكتوبه...

١-اختار معركتك.                  choose your battle 💡يعني ايه؟ يعني بالمختصر المفيد ، انت لك معارك كتير مع ولادك مينفعش تخوض فيها كلها مره واحده ، لازم تختار واحده بس في الوقت الحالي و تحطها أولويه، و باقي المعارك التانيه هيجي لها دور. 🤌مثال لو أُم بتبص علي البيت كدا لقت كله مكركب و كله محتاج ترويق و تنظيف،  هتفضلي تلمي من كل حته شويه ، و في نص تطبخي و طول ما انت ماشيه تلمي، و بعدين اخر اليوم تبقي تعبانه🤦🏻‍♀️ و لسه البيت مكركب! ليه ؟  عشان مختارتيش معركتك، مرتبتيش الاولويات ، مكتبتيش و خطتي هبدأ منين و ترتيبهم حسب اللي مهم يتعمل النهارده و اللي ممكن يكون بكرا و هكذا. نفس الحكايه لو انا ابني في اكتر من سلوك بيعمله محتاج تعديل مينفعش أما أكلمه اقول له " انا زعلانه منك انك مش بتشارك اللعبه مع اخوك و كمان بتضربه و كمان حدفت اللعبه جت في وشي حد يضرب مامته و بعدين فضلت تصرخ و تعيط و انت بتتكلم و محدش فاهم منك حاجه" هيقولك  "انا اسف" و هتقولي "متعملش كدا تاني " و حضن و بوسه. هل هو اتعلم حاجه ؟🤔  لا 🤦🏻‍♀️ ليه؟   ل...

تائها و مش عارفه أبدا منين🤯 هقول لك علي شويه حاجات من وجه نظري بعد تدريب و قرأه و تجارب هي " أ ب" تربيه. ١- اختار/ي معركتك choose your battle  ٢- التايمر ٣- التعزيز ٤- الاحتفال بالانجاز ٥- الروتين المكتوب/المرسوم  ٦-انتَ/انتِ مراه لابنك ٧- مراعاه الفروق الفرديه  باذن الله نتكلم عن كل واحده لوحدها في بوست.😊 مفيش عصايا سحريه تحل المشاكل🪄 ، في مجهود مبذول قصاده نتيجه مرجوه. بكل الحب أن كل طفل يأخد حقه أنه يتفهم و حقه في أنه يتعلم❤️ #كنت مكانك #التربيه تدريب مش فهلوه #امهات بتحاول #انت مش لوحدك #تعديل سلوك

محل اللعب🧐 اللي في وسط المول😡.  اللي ساعات بتلاقيه قدام الهايبر عشان لو ولادك كانوا كويسين في السوبر ماركت و انت خارج و ماشي وتعبت بقا و عايز تروح و بتفكر بقا لسه هرص الحاجه و هتبل الفراخ و اشلها . هوب تلاقي محل اللعب في وشك عشان تروح متنكد🙄 بعيل بيعيط علي لعبه و تقريبا اختها عنده في البيت أو لعبه عايزه مرتب شهر لوحدها ! الله يسمحه بصراحه اللي عمل كدا في الاهالي🤫، و يسامح اللي ماسك لك افكار التسويق😎 طيب عايزين حلول عمليه🤔 زي ما اتفقنا أن كل حاجه لازم تمشي بالاتفاق ، زي ما اتفقنا و خططنا و عملنا لسته للسوبر ماركت . هنقعد و نتفق و نعمل خطه للعب و شرائها. انا بقولك نصائح مش من كتب و لا كلام علي ورق لا، اللي بتكتب دي🙋🏻‍♀️ جايه لكم من القاع من الحضيض 👹 من تجربه أن احنا بننهار علي الارض و اللي ما يشتري يتفرج علي الدراما اللي بتحصل في المحل، وبرا المحل. من أن صاحب المحل بيبصلك عشان تخرج انت ابنك عشان صوره المحل بقت وحشه🤫 أو ابنك كسر المحل 🫣 انا جايلك من مواقف اللي كنا بنشتري اي حاجه من المحل و انا مش راضيه بس عشان نمشي و نشتري نفسنا ، عشان مكنتش عارفه اعمل ايه او اتصرف ازاي .🫤...

ساعات أما اكون ماشيه في مول أو هايبر ماركت ، و اشوف طفل روحه رايحه كدا من كتر العياط😭 ، أو رامي نفسه في الأرض اعتراضا علي أنه عايز لعبه من علي الرف أو شيكولاته مثلا. بيصعب عليا الأهل و الطفل. الأهل اللي هما نوعين يا بيلطش و يمشي الولد غصب عنه أو يشيله و الولد بيزيد مش بيسكت أو بيسكت و دا أما يكبر هيبقا عنده مشاكل كتير اوعي تفتكر أنه اتربي🙈. أو النوع التاني اللي بيكون محرج من منظر ابنه أو بنته و مش عارف يعمل ايه و بيحاول يسكته🫣. و الاتنين لسه قدامهم وقت عشان يخلصوا الطلبات يعني لسه شويه في السوبر ماركت. ضيف علي الموقف دا نظرات الناس و يا سلام لو تعليق🙄 ناقصه هي ، أو تانت اللذيذه اللي بتزعق و هي ماشيه علي اساس انها كدا بتساعد و العيل هيكش و يسكت🙄. معلش يا تانت نيتك خير بس الموضوع مش ناقصك صراحه😊 بيكون صعبان عليا الطفل،😐 لانه مليان مشاعر مش عارف يصرفها بالطريقه الصح😤، هو محتاج توجيه مش اكتر و هيبقا زي الفل ، بس محدش قعد معاه و فهمه براحه.🧐 الموقف دا كنت فيه كتيييييير شويه قبل ما افهم و كتيييير بعد ما فهمت و قرأت و حضرت دورات و وورش . غير أن ولادي عندهم احتياجاتهم الخاصه، أو زي ما...