العيال و السوبرماركت
ساعات أما اكون ماشيه في مول أو هايبر ماركت ، و اشوف طفل روحه رايحه كدا من كتر العياط😭 ، أو رامي نفسه في الأرض اعتراضا علي أنه عايز لعبه من علي الرف أو شيكولاته مثلا.
بيصعب عليا الأهل و الطفل.
الأهل اللي هما نوعين يا بيلطش و يمشي الولد غصب عنه أو يشيله و الولد بيزيد مش بيسكت أو بيسكت و دا أما يكبر هيبقا عنده مشاكل كتير اوعي تفتكر أنه اتربي🙈.
أو النوع التاني اللي بيكون محرج من منظر ابنه أو بنته و مش عارف يعمل ايه و بيحاول يسكته🫣.
و الاتنين لسه قدامهم وقت عشان يخلصوا الطلبات يعني لسه شويه في السوبر ماركت.
ضيف علي الموقف دا نظرات الناس و يا سلام لو تعليق🙄 ناقصه هي ، أو تانت اللذيذه اللي بتزعق و هي ماشيه علي اساس انها كدا بتساعد و العيل هيكش و يسكت🙄. معلش يا تانت نيتك خير بس الموضوع مش ناقصك صراحه😊
بيكون صعبان عليا الطفل،😐 لانه مليان مشاعر مش عارف يصرفها بالطريقه الصح😤، هو محتاج توجيه مش اكتر و هيبقا زي الفل ، بس محدش قعد معاه و فهمه براحه.🧐
الموقف دا كنت فيه كتيييييير شويه قبل ما افهم و كتيييير بعد ما فهمت و قرأت و حضرت دورات و وورش .
غير أن ولادي عندهم احتياجاتهم الخاصه، أو زي ما بحب اقولها احتياجات زياده( فرط حركه و عسر قراءه و كتابه).
دا كان سبب أن عايزه حلول عمليه في مواقف كتير.
بس الواحد أما بيبص حوليه مش شرط يكون ابنك او بنتك عنده احتياجات خاصه عشان تتعلمي أو تقراي أو تشوف فديو تعليمي عن التربيه، الاطفال كلهم تقريبا خصوصا في السنين الأولي بيكونوا زي بعض محتاجين تفهمهم و تشرح لهم كل تفصيله عشان يكبروا و يكونوا عارفين و فاهمين يتصرفوا ازاي لوحدهم من اصدق مصدر و هو الاب و الام.
شجعتني صاحبتي أن أكتب و أشير اللي اتعلمته في رحلتي المستمرة مع اولادي لعله ينفع و الناس تستفيد💗 Remonda Bahnasy
هقول لك شويه حلول لموضوع الهايبر و إن شاء الله نوصل لنتائج احسن:
1*لو ممكن نخلص طلبات البيت من غير العيال يبقي كويس لان دائما و ابدا بقول الشوبينج و اللف في المول مش مكان اطفال، هما مكانهم في منطقه العاب ،نادي يطلعوا طاقه ، ممكن نخرج في المول و نمشي و نتعلم ازاي نمشي ، بس مش دا الأساس ، لانك بتروحي البيت متنكده انك مستمتعتيش بالخروجه.
2*لا مجال ولازم يجوا معايا الشوبينج عشان هشتري لهم هدوم مثلا ، أو عشان وقتي ضيق ولازم يكون ا معايا في السوبر ماركت، يبقا لازم افهمهم و اجهزهم من قبلها مش خبت لزق يلاقي نفسه في الهايبر و مطلوب منه يمشي زي الالف مش هيحصل🙂 ، تحبي انت جوزك يقول لك و انت مش محضره نفسك يلا هعدي علي اصحابنا نقعد و نسهر مثلا مثلا و انت مش لابسه و مش متحضره ، اكيد لا و هتبقي خناقه 😡، نفس الفكره عاملوا عيالكم أنهم أشخاص لهم حق أنهم يعرفوا هما رايحين فين و ليه و هنعمل ايه و هنقعد قد ايه.
3* لو رايحين نجيب طلبات الاسبوع ممكن اخلي ولادي يساعدوني ، بما أن بحضرهم أن رايحين السوبر ماركت، قبلها بكام ساعه نقعد سوا نكتب لسته الطلبات أو قبلها بيوم و تقوليلوا نفسك تشتري ايه شبسي، بسكوت.... حاجات في حدود المعقول ، و تفهمي لو صغير لك بس حاجتين ولو كبير و فاهم في الفلوس ، قوليلوا لك مثلا 15جنيه بعزق يا عم و روق نفسك😅
4* فكره تانيه لو انت رايقه نقصص صور المنتجات اللي في مجله العروض و احتفظ بها و قبلها بيوم نعمل لسته و ولادك يشوفوا من الصور اللي قصناها و يعملوا في ورقه فاضيه لسته بالطلبات.
5*لو ابنك او بنتك كبار يعملوا لسته بالحاجات اللي هما عايزين و يقدروا يجيبوها بمعني احمد هياخد من اللسته (اكياس المكرونه و الصلصه و الزيت ) و مريم هتاخد من اللسته(اللبن و الفول و الطماطم و الخيار). كل دا و انت معاهم و تقولي عايزه مثلا ١٠ خيارات أو تكونوا كاتبين الاعداد من الاول في اللسته. ممكن كمان تدخليهم معاك في مقارنه الاسعار و العروض.
6* لو صغيرين و عملت اللسته بالصور هيبقوا ماشين معاك بيدوروا علي الصور ، و نفرح بقا و نهيص لما نجيبها.
7* طول الوقت لااااازم مدح أن شاء الله تعملي تايمر كل 10دقايق علي الموبيل ، لازم تقولي لهم (شكرا بتساعدوني، شكرا علي المجهود الرائع، انا فخوره بيكم جدا، لو حط حاجه في الترولي ثقيله شويه، تقولي له، بطل و رجل بتساعد ماما ولو بنت اشكريها انها شالت التقيل عنك)
8*في النص لازم نفكرهم بالحاجه اللي طلبوها اللي هي حاجه حلوه او شبسي لأنها من الطلبات.
كل دا بيحول الاطفال من أنهم عبء عليك وعلي ابوهم في مشوار الهايبر علي أنهم جزء من عمليه الشراء و بيساعدوكم، مش بعيد هما اللي يطلبوا يروحوا عشان فكره ان الشراء بقت نشاط عائلي بيجمعنا قبل ما نروح في مرحله التحضير و احنا في الهايبر مشغولين في لسته الطلبات ، دا كمان بيخليهم يحسوا بالثقه و الفخر أنهم بيساعدوا و فخر أن بيشوفوا تشجيع ماما و بابا ... كل دا بيفرق جدا مع الولاد.
اللي بقوله شويه افكار ممكن انتوا تكونوا أكثر ابداعا و تفكروا في حاجات احسن.
خلي بالكم مش لازم من اول مره تنجح الفكره ، المهم انكم تفضلوا تحاولوا، و ممكن تجربوا في الاول لو الاولاد صغيرين و خربنها اصلا ،😎 جربوا في سوبر ماركت صغير الاول كأنه تدريب. و زي ما اتفقنا لااااازم مدح و شكر و فرحه كأنه نحج في الثانويه و جاب 99%😉
بلاش نجيب سيره السلبيات القديمه🤦♀️متقوليش شاطر انك ما عيطش زي المره اللي فاتت، اوعوا تفكروا العيال بالماضي☺️ احنا ولاد النهارده. بدل ما يفتكر و بقول في نفسه " صحيح أما اعيط علي اللعب اللي جوا بقا"🫣
موضوع اللعب بوست تاني أن شاء الله 💗
كل حاجه محتاجه تدريب مفيش عيل بينزل معاه كل السوفت وير بتاع كل المواقف و حسن التصرف فيها.
واحده واحده انتوا اتعلموا، و طلب المساعده من مختص مش عيب و انكم تقروا و تثقفوا نفسكم في ازاي اتعامل مع ولادي في كل مرحله و في المواقف الصعبه مهم جدا.
#كنت مكانك 🥰
#التربيه تدريب مش فهلوه🧐