محل اللعب
محل اللعب🧐 اللي في وسط المول😡.
اللي ساعات بتلاقيه قدام الهايبر عشان لو ولادك كانوا كويسين في السوبر ماركت و انت خارج و ماشي وتعبت بقا و عايز تروح و بتفكر بقا لسه هرص الحاجه و هتبل الفراخ و اشلها .
هوب تلاقي محل اللعب في وشك عشان تروح متنكد🙄 بعيل بيعيط علي لعبه و تقريبا اختها عنده في البيت أو لعبه عايزه مرتب شهر لوحدها !
الله يسمحه بصراحه اللي عمل كدا في الاهالي🤫، و يسامح اللي ماسك لك افكار التسويق😎
طيب عايزين حلول عمليه🤔
زي ما اتفقنا أن كل حاجه لازم تمشي بالاتفاق ، زي ما اتفقنا و خططنا و عملنا لسته للسوبر ماركت .
هنقعد و نتفق و نعمل خطه للعب و شرائها.
انا بقولك نصائح مش من كتب و لا كلام علي ورق لا، اللي بتكتب دي🙋🏻♀️ جايه لكم من القاع من الحضيض 👹 من تجربه أن احنا بننهار علي الارض و اللي ما يشتري يتفرج علي الدراما اللي بتحصل في المحل، وبرا المحل. من أن صاحب المحل بيبصلك عشان تخرج انت ابنك عشان صوره المحل بقت وحشه🤫 أو ابنك كسر المحل 🫣
انا جايلك من مواقف اللي كنا بنشتري اي حاجه من المحل و انا مش راضيه بس عشان نمشي و نشتري نفسنا ، عشان مكنتش عارفه اعمل ايه او اتصرف ازاي .🫤
فا باذن الله الكلام اللي هكتبه دا حلو و هينفع و عملي، اسال مجرب ولا تسال طبيب، مع احترامي طبعا🙂
طيب عملت ايه عشان نحل المشكله دي؟
انا بصراحه مكنتش عارفه 🤔، بما أن ابني كان بياخد جلسات علاج سلوكي فكنت بسألهم في كل حاجه ،و قالوا احنا هنخرج معاكم بدل ما الجلسه ما تكون في المركز هنيجي معاك المول و هنوريكي تعملي ايه. 🤓حلو .
هقولكم حصل ايه و انتوا اعملوا زي ما هقول.
سهله اهيه😉
مبدئيا احنا نزلنا مع المعالجين ٣ مرات ، مرتين كانوا فضيحه و عياط و رزع الدماغ في الأرض🤕 و تالت واحده كانت ناجحه و عدت و بدأ ابني يفهم.
ما هو معذور برضوا مش معاه سوفت وير زي ما اتفقنا ، و انا كمان معنديش سوفت وير بتاع التعامل مع شراء اللعب و اتعلمت.🕵️
يعني الحياه ماشيه زي السكينه في الحلاوه،😁
بنسبه ٧٠% اه.🤲🏻 الحمد لله
و طب و الباقي 🤔، غلطات و دا المتوقع و اللي ممكن يحصل عادي حتي بعد ما نوصل لنتيجه حلوه ممكن يحصل هفوات و تضطر تشتري حاجه بسيطه عشان تعدي الليله ، بس المهم أن الأساس مش كده.💪🏻
طيب ايه هو اللي انا اتعلمته🏫:
١* التجهيز و التحضير أن احنا رايحين المول📝 هنكتب الخطوات واضحه و قصيره و سهله في ورقه صغيره هتفضل معلنا طول الوقت🧐
1-مول
2-محل اللعب ،٥ دقايق
3-السوبر ماركت(عاملين له لسته)
4-محل اللعب،٥ دقايق
5-نتغدي سوا
هنتفق من البيت هنتفرج علي اللعب اللي في المحل " بس هنتفرج" "just looking" .
و يقول لك "بس هنتفرج".
احنا هنشتري لعب النهارده ؟ لا بس هنتفرج.
🤌 نقول الكلام دا ببهجه و فرح مش بطريقه فيها تعالي و أمر.
هنقعد قد ايه في المحل؟ ٥ دقائق⏲️ ، هنعمل التايمر ، تيجي تعمله انت علي الموبيل، هيوافق و يدوس عليه اول ما يدخل.
طول ما احنا جوا اوريله فاضل قد ايه عشان مش مره واحده التايمر يرن و نطلع ، لازم امهد.
هنطلع من المحل و معانا لسته صغيره متفقين عليها من البيت أن احنا هنشتري عصير و شبسي و نقعد ناكلهم في المول .
2* مش طالع بالساهل😡 هفضحكوا الاول😇 لأن عايز لعبه😭 ،
هنقول تعالي قلب ماما و حياتها التايمر رن⏲️ و أما بيرن هنروح اللخطوه اللي بعدها.
لا مش طالع 🤬.
هنشيله براحه مش بعصبيه و نطلع. ليه؟
عشان انا طلبت منه براحه و هدوء أنه يطلع عادي و هو رفض.
هنسيبه لغايه ما يسكت و يبطل العياط و اكون جنبه عشان ما يأذيش نفسه و اول ما يهدئ و يسكت هقول له جاهز نكمل الخطه و نروح الماركت ؟!
🤔 ايه دا مش هنعاقبه علي الهبل دا ؟ لا 🤌
عشان أن هدفي نتدرب علي دخول و خروج محل اللعب من غير ما نشتري، ركزوا علي الهدف الأساسي 🤓
3* هيقوم و يكمل مشي و يروح و يشتري اللسته و يهدئ شويه نقعد نتكلم بقا و نحكي و نهزر و كان شيئا لم يكن ولا اجيب سيره العياط ابدا.
ها خلصت اكل ، مكتوب هنعمل ايه بعد اكل الحاجه الحلوه؟ هندخل تاني محل اللعب نتفرج،" بس نتفرج", هنقعد قد ايه في المحل؟
⏲️ ٥ دقائق ، هنعمل التايمر ، تيجي تعمله انت علي الموبيل، هيوافق و يدوس عليه اول ما يدخل، و طول ما احنا جوا اوريله فاضل قد ايه عشان مش مره واحده التايمر يرن و نطلع ، لازم امهد.
قاصده اكتبها تاني😁
4* لوقالك طب مش هنشتري ، هتبصوا سوا في الورقه هو مكتوب نشتري؟ لا.
طيب و احنا في البيت بنتفق قلنا هنشتري؟ لا. يبقا هنعمل ايه؟ بس هنتفرج.
5* هندخل تاني و نتفرج و نتكلم علي اللعبه و لو في حاجه مفتوحه نجربها ، اوي تنسي التايمر⏲️ ، و اول ما يرن هنخرج ، بفضيحه طبعا 🤦♀️
طيب و لو مخرجش🤔 هشيله براحه مش بعصبيه و هخرجه برا المحل و نقف في حته علي جنب لغايه ما يهدئ، و نقول له بعد كدا في الخطه مكتوب هنروح فين ؟🤔اه ، هنتغدي سوا "بعيد عن المحل طبعا" .
طيب صمم نمشي من جنب المحل ؟ماشي هنمشي من عند المحل ، بس مش هندخل مش مكتوب كدا في الخطوه دي 😉
طيب مشي بهدوء و سلام ، الحمد لله.🤲🏻
ضحك عليك و دخل يجري 😅 هاتيه براحه في حته علي جنب لغايه ما يهدئ مش عايزاك تنسي انك مش بتكلميه و هو بيعط عشان هو مش سامع 🙉 لغايه ما يهدئ. نتكلم تاني براحه و نبص في الخطه ها هنروح فين؟
6* و نعيد تاني نروح نتغدي يلا بينا هيقوم معاك لانه تعب ، و ممكن تقترحي لو عايز يروح.
دا اللي شوفته و ادربت عليه علي ايد المختصين ، كان سهل؟ لا لا لا ،😭
كان يستاهل البهدله و قلت القيمه و النظرات و تحسي أن حد هيطلب البوليس لانه شكله مش ابنك🫣
اه يستاهل جدا جدا جدا🥰
السيناريو دا اتعمل مرتين، و بعد كدا في المره التالته بدأت موضوع لسته السوبر ماركت اللي بصور و اتفجات جدا أما لقيتها نجحت🥳
🥳 و احلي من كدا أن كلمه "بس هنتفرج "دخلت المخ، كأنك نزلت app جديده سهلت لك حاجه كانت صعبه.
🔵طيب ايه حاجات ممكن تضاف، لو اتزنقت و زنوا رغم التحضير و التخطيط ؟
هقول له عندي فكره ايه رأيك اللعبه دي نصورها بالموبيل 📲و أما يبقا معاد الشراء نيجي نشتريها عشان مننسهاش! و نصور المحل من برا برضوا علي اساس متنساش مكانه.
🔵ولو معانا ورقه و قلم📝 ممكن نكتب اللي اللعب اللي عايزها و سعرها أهي حاجه تشغلهم.
🔵في مرحله قبل دي و هي فكره الفلوس و ازاي نحوش بس دي عايزه ولاد كبار.
🔵لو صغيرين زي ما انا بدأت مع ابني ، يبقا ممكن نحدد علي النتيجه لو فاهم في الشهور و اقول له لك في الشهر لعبه ب ٥٠ جنيه او ١٠٠ جنيه ، وانت حر عايز تجبها اول الشهر في نصه في آخره ، تعالي نحدد يوم ، ابنك/بنتك اللي يقوله عشان يحس أنه له رأي ، نرجع بقا نشوف الصور اللي صورتها عايز حاجه منهم ، في غالب لا و بنسوا و بيختاروا حاجه تانيه.
❤️كل حاجه عايزه تدريب و صبر .
🚫لو انت كل ما بتنزلي بتدخل محلات بسيطه فيها لعب رخيصه و سهل تتجاب ، هو مش هيفهم (انا كنت بعمل كدا), هو مش فاهم المحل الرخيص من الغالي ، هو شايف انك دايما موافقه و مطوعاه، و امايجي محل غالي و يمسك في حاجه هو مش فاهم أنها غاليه هو عايزها و خلاص.
واحده واحده و هتيجي أن شاء الله ☺️
✋مع كل المحاولات و التخطيط اوعوا تنسوا تدعوا لاولادكم و تطلبوا من ربنا المساعده 🤲🏻
❤️بكل الحب و التمني لك طفل أنه يتفهم و ياخد فرصه أنه يتعلم و بتصبر عليه❤️
❤️ريهام عبدالحليم❤️
#كنت مكانك
#التربيه تدريب مش فهلوه