اختار معركتك choose your battle
١-اختار معركتك.
choose your battle
💡يعني ايه؟ يعني بالمختصر المفيد ، انت لك معارك كتير مع ولادك مينفعش تخوض فيها كلها مره واحده ، لازم تختار واحده بس في الوقت الحالي و تحطها أولويه، و باقي المعارك التانيه هيجي لها دور.
🤌مثال لو أُم بتبص علي البيت كدا لقت كله مكركب و كله محتاج ترويق و تنظيف، هتفضلي تلمي من كل حته شويه ، و في نص تطبخي و طول ما انت ماشيه تلمي، و بعدين اخر اليوم تبقي تعبانه🤦🏻♀️ و لسه البيت مكركب! ليه ؟
عشان مختارتيش معركتك، مرتبتيش الاولويات ، مكتبتيش و خطتي هبدأ منين و ترتيبهم حسب اللي مهم يتعمل النهارده و اللي ممكن يكون بكرا و هكذا.
نفس الحكايه لو انا ابني في اكتر من سلوك بيعمله محتاج تعديل مينفعش أما أكلمه اقول له " انا زعلانه منك انك مش بتشارك اللعبه مع اخوك و كمان بتضربه و كمان حدفت اللعبه جت في وشي حد يضرب مامته و بعدين فضلت تصرخ و تعيط و انت بتتكلم و محدش فاهم منك حاجه" هيقولك "انا اسف" و هتقولي "متعملش كدا تاني " و حضن و بوسه.
هل هو اتعلم حاجه ؟🤔
لا 🤦🏻♀️
ليه؟
لأن دي حاجات كتير اوي عليه أنه يفتكرها و هو لسه طفل ولسه بيتعلم.
😉هو انت عرفت تخلي البيت كله نظيف مره واحده!
طيب و الحل ؟
📝ورقه و قلم و علي رواقه مش و انت متعصبه ، اكتبي ابني محتاج سلوكه يبقا احسن في ايه؟ و بعدين رتبيهم بالاولويه، ولو كلهم بنفس الاولويه ،هناخد اللي فيها اذيه لنفسه أو للآخرين و تكون هي الأولوية.
🤌مثال: ابني أو بنتي زي المثال اللي فوق:
١- مش بيشارك
٢- بيضرب
٣- بيحدف
٤- بيصرخ و يعيط بصوت عالي
اي واحده أكثر اهميه؟ الضرب، لأن فيها اذيه للغير و بعدها الحدف ، بعدين المشاركه لأنها مهاره مهمه للمدرسه، و اخر حاجه الصريخ و العياط لأن دا تعبير عن المشاعر.
👍🏻طيب اختارنا المعركه و هي "الضرب" ، مش هستني أما يضرب و اشتغل لا.
📝بالخطوات" تنفع لتعديل أي سلوك"
١-أبدأ أنا
٢- هنقرا و نسمع
٣-نشجع
٤- نركز علي السلوك فقط إذا حدث
١- أبدأ أنا ، لو انتِ أو بابا بتضربوا كا نوع من أنواع العقاب، انا اسفه انت بتنفخي في قربه مخرومه زي ما بنقول بالمصري . لازم تبطلي ضرب لو عايزه ابنك يبطل ضرب.
٢- هنقرأ و نسمع، قصص عن استخدامات اليد الجميله الكتيره أو هنسمع القصه و نشوفها علي اليوتيوب ، انا مجربه قصه
Hands are not for hitting
اكتر من رائعه و لها نسختين واحده للاولاد الصغيرين، و نسخه للاكبر شويه، أو ندور علي قصص بنفس المبدأ.
٣-التشجيع، اي حاجه بيعملها بايده غير الضرب اطلع بها السما ، بيرسم، بيلون، بياكل بيشرب، بيناول ماما حاجه ، بيطبطب علي حد، لازم اشجعه و اقول له :
"الله ايه دا ايدك جميله و بتلون حلو اوي "
" ايدك حلوه اوي و انت بتعمل high five".
💡بعمل ايه كدا، بلفت انتباهه أن انا شايفاك و شايفه سلوكك الحلو.
💡بلفت انتباهه للحاجات الجميله اللي ممكن نعملها بأيدينا.
📚لأن شاف القصه و فرق بين الحلو و الوحش.
٤- التركيز علي السلوك لو حصل ، لو حصل خناقه مع إخواته و ضرب و دا عادي هيحصل ، لو نفع تلحقي قبل الضرب كويس.
لو لا، نزلي أيده جنبك ، ابعيدي اخوه و لو متعصب و بدأ يركل ، لفيه براحه يبقا ظهره في وشك ،عشان الضرب ميكونش فيكي.لغايه ما يهدا.
🙏 ارجوكي بلاش تتكلمي و هو في حاله الغضب لانه مش سامع🙉. و بعدين أما يهدأ براحه تسأليه ، هو ايه اللي حصل؟و تسمعيه، و حلي المشكله ، و في الاخر تقولي له فاكر القصه اليد مش للضرب.
لو حدف حاجه او ضربه جت فيكي🙈 ، افتكري أن المعركه اللي انت اخترتها و عايزه تحليها هي الضرب، و أن باقي السلوكيات هيجي لها دور.
و قبل ما يجي لها الدور هتكون قلت باذن الله.
ممكن اخد كل اسبوع سلوك ، أو كل ٣ ايام ، حسب شده السلوك و تكراره.
قراءه القصه أو سمعها لازم يكون كثير ، يوم و يوم اقل حاجه.
بكل الحب بكتب✍️ علي أمل أن كل طفل يأخد حقه في أنه يتفهم و الصبر عليه ❤️
ريهام عبدالحليم✍️
#كنت_مكانك
#التربيه_تدريب_مش_فهلوه
#انت_مش_لوحدك
#امهات_بتحاول
#تعديل_سلوك